من الحياة
السيد البابلي
مبروك يا بيه.. لقيت لك مقبرة!!
جرس التليفون المحمول في الصباح الباكر ظل يرن ويرن.. وأنا أحاول اني أعمل ماسمعتش واستمر في النوم.. لكن مفيش فايدة.. رديت وآلو.. مين علي الصبح.. ومين.. مين إيه يا سعادة البيه.. أنا جايب لك خير كتير جوي.. أنا لجيت لك مجبرة "مقبرة".
وانتبهت.. مقبرة ايه علي الصبح والصعيدي اللي بيكلمني ده مبسوط قوي كدة ليه.. ومقبرة ايه دي اللي ييجي من وراها الخير الكتير.. دي أكيد من مقابر الأيام دي اللي بيعلنوا عنها ويقولوا انها بترد الروح!
ومقبرة ايه يا مجنون انت.. مين قالك اني عاوز مقبرة. لما أموت يا أخي أبقي اندفن في أي حتة.. وبعدين تعالي ايه الحكاية وبتتصل بي ليه؟ويا بيه دي مقبرة أثرية.. أنا لقيتها.. وعاوزينك تتصرف معانا فيها وهاييجي من وراها خير ليك ولينا!
وآه.. بقي الحكاية كدة.. ومين يا ابن الفرطوس قالك اني ليه في الكلام ده.. مين اللي حدفك علينا علي الصبح. والله يا ابن ال........ لأوديك في داهية!
وداهية تاخدك انت.. انت راجل مش وش ونعمة.. وخسارة فيك المقبرة!
والحكاية دي غريبة فعلا وأنا احتفظت برقم التليفون المحمول اللي اتكلم منه أخونا الصعيدي وقلت يمكن حد من بتوع مباحث الآثار يهتم ولاحد من بتوع التجارة في المقابر دي يكون بيقرأ حريتي يقول هات يا حبيبي رقم التليفون واحنا نتصرف ويكون لك من الحب جانب!
وأنا كمان مش فاهم حكاية المقابر دي ايه.. لسة فيه مقابر أثرية حد بيلاقيها.. وإذا كان فيه يبقي بتروح فين وبتتهرب ازاي!
وزمان سمعنا كلام كثير قوي عن تهريب الآثار وعن ناس كبار كبروا مع الحكاية دي.. وناس معروفين بره بالاسم ولما الواحد بيدخل متحف في أي مكان بره مصر بيلاقي آثار كثيرة قوي فرعونية وبيسأل جت ازاي ومن فين ومابيلاقيش اجابات واضحة ولا محددة.
ويظهر لأن الآثار عندنا كثيرة وبالكوم وماحدش عارف قيمتها فغيرنا جه واستولي عليها وبني عليها متحف ومتاحف وجمع من وراها دهب وألماظ وياقوت.
وعلي كل حال احنا بصراحة ارتكبنا أكبر جريمة في حق انفسنا ونستاهل المتاعب الاقتصادية اللي احنا فيها. والبهدلة اللي احنا شايفنها في حياتنا فحد يكون عنده كل الآثار العظيمة دي فرعونية وقبطية واسلامية ويكون ده حاله!
دا القاهرة لوحدها مدينة اثرية مفتوحة مليانة مزارات وأماكن سياحية لو اديناها شوية اهتمام ورعاية ونظافة لكان السياح من كل العالم واقفين طوابير أطول من طوابير الخبز ولكانت الناس في مصر عايشة في نعيم ما بعده نعيم ويمكن كلها كمان كانت تشتغل في السياحة وخدمة السياح!
لكن نقول ايه يظهر مكتوب علينا بس الفقر والجهل والتخلف فأنا شفت مرة في حتة اسمها قلعة الكبش سبيل أثري مليان نقوش جميلة وحلوة.. وله تاريخ وحكايات ولقيت جنب السبيل ده واحد واقف يقضي حاجته هناك بشكل عادي.. وعادي جدا كمان.. آمال ايه.. الباشا بيعبر عن رأيه بحرية في الطريق العام.. ما هي دية الشفافية ولا بلاش!
ومادام ده احترامنا للآثار.. ومادام ده سلوكنا في التعامل مع الكنوز عندنا يبقي الصعيدي اللي لقي مقبرة عنده حق هو كمان مايبلغش الدولة ولا يسلم لهم المقبرة ويدور علي ناس يشتروها ويهربوها وده في نظره عمل من أعمال الخير وخير كتير وهو علي كل حال معذور في كدة ماهي مصر قدام عينيه من سبعة آلاف سنة هو ده حالها علي طول بتتسرق بس الخير بتاعها مش للكل.. الخير للي بيعرفوا السكة وبيسرقوا الصندوق مع ان المفتاح المفروض يكون معانا!